A kεra laada ye, sankura o sankura, jamana maabaw bε wuli ka taa foli bila jamankuntigi la k’u fεεla fɔ a ye jamana taabolo kan. Ɲinan ta hukumu kɔnɔ, maaba ninnu da sera bεn, lakana, kalanko ani baloko sabatili ma jamana kɔnɔ, u da sera fana sigikafɔba bεnkanw waleyali ma, ani denmisεnninw ka dɔrɔgu ta ko.
Diinεɲεmɔgɔw ni laadalafangabulonw jɔyɔrɔ ka bon kosεbε bεn ni kelenya sabatili an ka jamana kɔnɔ, kabini kεlε donna Mali kɔnɔ, u bε wulikajɔ bεε la walasa ka bεn lasegin jamana kɔnɔ. O kɔsɔn, maaba ninnu ka cεsiri n’u nafa waliɲumandɔn na ntεnεdon zanwuyekalo tile 6 san 2020, kuluba u taalen sankura foli bila jamanakuntigi Iburahimu Bubakari Keyita n’a ka denmaya an’a jεɲɔgɔnw la. Minisiriɲεmɔgɔ Bubu Sise ni minisiri caman fana tun bε kεnε kan, fo ka se jamanakuntigi yεrε baarakεɲɔgɔnw ma.
Sulemani ɲare ye Bamakɔ tu tigεbaaw ka ciden ye, kuma dilen a ma, a fɔlɔla ka duwawu don jamana ye bεn ni kelenya ka sabati, kasɔrɔ ka tasibila kε sɔrɔdasifirew ye minnu ni tara kεlεyɔrɔ la. O tεmεnen kɔ, a da sera bεn sigikafɔba nafaw ma, k’a ɲini jamanakuntigi fε halisa a ka fasodenw faraɲɔgɔn kan. O bɔlen kɔ yen a da sera ɲinan saniya cogoya fana ma, a y’a jira ko ɲinan samiya jigicogo ɲεna, o kɔsɔn a y’a ɲini jamanakuntigi fε, a ka fεεrε jɔjɔnw tigε walasa o suman bεε kana labɔ jamana kɔnɔ. A tila k’a ɲini jamanakuntigi fε tuguni, a k’a kε cogo bεε la kalansow ka kε denmisεnninw ladamu yɔrɔ ye.
Ale bɔlen kɔ yen, Mali silamεtɔnba ɲεmɔgɔba n’o ye Serifu Usumani Madani Hayidara ye, ale y’a jira ko kabini tuma jan, olu ye wulikajɔw ni sigikafɔw boloda ni kulu marifatigiw ye walasa ka lakanabaliya kεlε kabɔ jamana marabolo dɔw kɔnɔ, ka basigi ni bεn kuntaala jan sabati. Serifukε y’a jira fana ko Mali silamεtɔnba ka wulikajɔ bonyan na kosεbε bεn sigikafɔba tεmεko ɲuman na. O tεmεnen kɔ, a ye jamanakuntigi fo a kumakan dili la sigikafɔla bεnkanw waleyali kama. O kɔfε, a y’a ɲini jamanakuntugu fε, a ka Mali silamεtɔnba sendon bεnkan ninnu waleyali baaraw la. Serifu Usumani Madani Haridara y’a jira fana ko mali silamεtɔnba kεlen bε ka bɔliba dɔ boloda bεn tɔgɔla moti mara kɔnɔ, siya fεn o fεn bε moti mara kɔnɔ, olu bεε sen bεna ye bɔli in na. A da sera fana Mali silamεtɔnba ka jɔrɔnanko dɔw ma, i n’a fɔ, dɔrɔgu minni denmisεnninw fε, ani barisow warali jamana kɔnɔ.
Min ye kerecεn diinε kuntigiba Karidinali Zan Zeribo ye Mali kerecεnw ka foli ci lase jamanakuntigi Iburahimu Bubakari Keyita ma a ka dεmεw la ka ɲεsin kerecεn diinε ma u ka seliw hukumu kɔnɔ. A ko wulikajɔ caman kεra bεn sabatiliko la jamana kɔnɔ, ko nka halisa gεlεya caman kun bε Mali kan nin sankura in kɔnɔ, ko wa jamana mago bε bεε kelen-kelen na ka dεmε na walasa k’o gεlεyaw wuli. Olu ye jamanadenw n’u bolofεnw lakanabaliya ye, denmisεnninw ladamubaliya, hadamadenya danbew tiɲεnni ni dugukoloko mankan ye, sifinw ka dɔrɔgu ta, fo ka se binkanni walew warali ma.
Jamanakuntigi Iburahimu Bubakari Keyita, a ka kuma kɔnɔ, a fana ye foli lasegin maaba minnu ma u ka sankura foli, ka duwawu kuraya jamana ye bεn sabatili la jamanadenw ni ɲɔgɔncε. Sigikafɔba siratigε la, jamanakuntigi y’a jira k’ale nisɔnjara kosεbε ka malidenw ye ka ɲɔgɔn sɔrɔ, ka sigi ka kuma jamana gεlεyaw kan walasa ka kuntilenna kelen ta jamana taabolo kan, kasɔrɔ kεlε ma bɔ a la. O kɔsɔn, aye diinεɲεmɔgɔw ni laadalafangabulon jɔyɔrɔ jira sigikafɔba tεmεko ɲuman la, a y’o fɔ k’u waliɲumandɔn o la. Jamanakuntigi ko ale bolo, nin sigikafɔ in kɔnɔ, malidenw y’u ŋaniya jira ko jamana marali kalifalen don olu minnu na, u k’u jɔyɔrɔ fin. O siratigε la, ko malidenw k’u hakililatigε, k’olu bε baara in kε ka se a dan na, k’u b’a kε ni sariya fagan ye min bε sentanw lakana.
O tεmεnen kɔ, jamanakuntigi y’a jira jamana lakanabaaw ka gεlεyaw ɲεkɔrɔ, ko sɔrɔdasiw degeli kεlε la ani k’u minεtigiya k’o bε to senna. O hukumu kɔnɔ, a ko k’an mago bε jεɲɔgɔnya sinsinnen na, ko ni mɔgɔ o mɔgɔ k’o tε tiɲε ye, o tigi ye manamanakan fɔ la ye. A ko mɔgɔ minnu b’a fɔ k’an dεmεbaaw, y’an juguw ye, olu tigiw ye jamana juguw ye, sabula u b’a fε, an k’an denw labila jatigεwale kεbaaw ye, u k’u faga fu. A ko an bε don min na bi, Barikani bε ka Mali sɔrɔdasiw dεmε jugu kεlεli la.
Denmisεnninw ka ɲanaminifεnw minniko siratigε la, jamanakuntigi y’a jira tiɲε don k’a tiɲεnin fanga ka bon jamana kɔnɔ sisan. O hukumu kɔnɔ, a y’a jira ko furadilanso / laboratuwari minnu jɔra jamana kɔnɔ, k’o mali ɲanaminifεnw bayεlεmabaa ye bi. O tεmεnen kɔ, a ye layidu ta ko diinεɲmɔgɔw ni laadalafangabulon sen bε don sigikafɔba bεnkanw waleyalikɔlɔsili jεkulu la.
Kunnafoni sεbεnbaaw :
Masa Sidibe (tubabukan)
Siyaka Sogoba (bamanankan)
