Mali gɔfɛrɛnaman haminankobaw dɔ ye denmisɛnnin kodɔnbaliw ka baara dabilali ye. O de kosɔn dɛmɛbaaw bɛ k’u bolo don a kɔrɔ sariyaw tali la, ka denmisɛnninw ka hakɛw lakana. Nka o sariya caman tɛ ka matarafa; kɛrɛnkɛrɛnnenya la samiyɛ fɛ ni kalanw balila, i bɛ dugubɔlɔnw ni suguw ani sirabadaw falen ye kodɔnbalininw na feerew la.
Kɔlɔsili la, muso caman bɛ jagofɛnw tigɛ ka da u denmusoninw kun, olu k’u dɛmɛ feere misɛnnin na. A dɔw mana u ka feerefɛn da u kun ka bɔ sɔgɔma, u tɛ kɔsegin du kɔnɔ ni fitirimagɛn tɛ. I bɛ tasadatugubaw falen y’u kun ka siraw tigɛ, hali a caman tɛ jateminɛ kɛ bolifɛn tɛmɛtaw la.
Yaalayaalafeere kɔlɔlɔ juguba bɛ denmisɛnnin kodɔnbaliw kan. U ka feerefɛnw bɛ se ka tunun, ka sonya u kun, dɔw bɛ se ka ban k’a ka wari sara, bin bɛ k’u kan cɛnimusoya sira fɛ, bolifɛntigiw bɛ se k’u tan u siratigɛtɔ, dɔw yɛrɛ bɛ se k’u ta ka taa n’u ye k’u feere mɔgɔ wɛrɛw ma. O bɛ se ka bange u fagali la u farikolo yɔrɔ dɔ nɔfɛ, walima u bilali la yɛrɛkunfeere ni diyagoyabaara la. O de la an bɛ denmisɛnnintunun, ani denmisɛnninfaga kɔlɔsi kosɛbɛ kalanbila kɔnɔna na.
Nin kɛra musomannin dɔ ye, min tɔgɔ ni jamu daminɛ ye A ni B ye.A delila ka tunun feere senfɛ ka si fo ka dugu jɛ. Ale ba de bɛ mangoro ni tiga sarada tabali kan u ka duda la k’u feere. Tuma caman na, a denmusonin tun b’a ɲini a fɛ, a ka tiga dɔ da ale kun a ka taa o yaala ; nka a tun tɛ sɔn o ma. Nin don wula fɛ, a ba sɔnna ka tiga kɛmɛsabala kɛ tasadatuguba kɔnɔ ka da a kun, a n’a terimuso bɔra, nka a dɔnna kɔfɛ ko terimuso in seginna ka bɔ a nɔfɛ.U ka so yɔrɔ tununna a la, a sira a kunfɛ dɔ ka du kɔnɔ. Dugu jɛlen, cɛ mɔgɔ sɛbɛ dɔ dara a kan ka n’a bila u ka so.
Musomannin min tɔgɔ ni jamu daminɛ ye F ni D ye, o ma ale ta ɲɔgɔnna garijɛgɛ diya sɔrɔ. Don o don, ale tun bɛ samaraw ta ka taa u feere Falajɛ garabali la. Nin don in na, cɛ dɔ ye samara 2 ta ka wari di a ma, ko a ka wari misɛn segin. Wari misɛn tun t’a bolo. Cɛ ko u ka taa olu sigiyɔrɔ la, k’a bɛ wari falen k’a ka samarasɔngɔ di. U taara yɔrɔ min na, mɔgɔ wɛrɛ tun tɛ yen. Cɛ in binna a kan cɛnimusoya la.
Nin kɛra Madamu Sise Fatumata Magasuba ye, min y’a kali, ko fo ka taa min kɛ sa, ale tɛ sɔn ka jagofɛn da a denmusonin si kun tuguni, o ka taa o yaala. A tun y’a fɔlɔ a denmusonin min na, o si hakɛ tun bɛ san 11 na. Alamisadon utikalo tile 29 san 2019, mototigi dɔ y’o furan ka bin, k’a bolo kelen kari. A k’ale na mɛɛn n’o ma bɔ ale kɔnɔ dɛ. A bɛ min fɔ denbaw ye, u k’u hakili to kodɔnbalininw ka feereko la. A makosa ka ca n’a makoɲɛ ye. Ni lakɔli bilala, a ka ɲi an k’an denw to an kɔrɔ du kɔnɔ k’u kalan gadon na; sabula u bɛna kɛ don dɔ furumusow ye.
Madamu Jawara Aminata Sangare fana ko denmuso 5 b’ale bolo. O k’ale bɛ jago misɛnnin kɛ; nka don si da kelen na, a si ma ɲɛbɔ yaalayaalafeere fɛ. Wa ale fana m’u bila a la. A ko mɔgɔ ka kan k’a den dege fɛnɲini na; nka o ɲuman ye n’a bɛ se k’a yɛrɛ bɔ ko la waati min na.
Ɲamakɔrɔ dugutigi b’a ɲini denbaw ni denfaw fɛ, u k’u janto u denw na sanga ni waati bɛɛ la. A ko salon, mɔbili ye dennin dɔ tan k’a sɛbɛkɔrɔ jogin. U y’a ta ka taa a furakɛ dɔgɔtɔrɔso la k’a sɔrɔ a somɔgɔw tɛ nin si kalama. U t’a kalama, sabula a bɛ bɔ sɔgɔmada fɛ, a segintuma b’a sɔrɔ su kora. A mansaw t’a miiri ko baasima fosi bɛ se k’a sɔrɔ a ka yaalayaalafeere kɔnɔna na. A kɛra kunnadiya ye a ma to a la; n’o tɛ a mansaw tun bɛ wele a su kunnan. Mɔgɔ minnu ye dennin ta ka taa a furakɛ, olu de kɛra mɔgɔ sɛbɛw ye. N’o tɛ u tun bɛ se ka taa k’a to yen. Dugutigi b’a ɲini sotigi bɛɛ fɛ, sanni an ka taa an da sufɛ, an ka taa an denw siyɔrɔw lajɛ n’a y’a sɔrɔ u bɛɛ bɛ yen fɔlɔ. Ni min tɛ yen, an kana da kasɔrɔ an m’a kunnafoni sɔrɔ.
