//Jamanakuntigi ye laseli kɛ jamanadenw ye

Jamanakuntigi ye laseli kɛ jamanadenw ye

Jamanakuntigi Ibarahimu Bubakari Keyita ye laseli min kɛ jamanadenw ye karidon zuwɛnkalo tile 14 san 2020, a y’a jira, ko ko minnu kɛra jamana in kɔnɔ kɔsa in na, k’a ye kɔlɔsiminɛ kɛ a bɛɛ lajɛlen kan. Minnu y’u ka dusukasiw jira, ani minnu ye kulekanw bɔ. Minnu ye laɲinniw kɛ ani k’a ɲinin u ta ka da bɔgɔ jeninnen kan. A ko Maliden kelen o kelen bɛ tɔɔrɔ sɔrɔ, walima k’a ka nisɔngoya jira, k’o bɛɛ ye sigimajɔko ye ale bolo ; ka da a kan ale ka baara ye jamana in kunko ɲɛnabɔli ye.

A k’a bɛ fɛn o fɛn kɛ, k’a bɛɛ kun ye Maliden kelenna ka se k’a yɛrɛ balo, ka laban ka se k’a ka denbaya doni ta.

K’a seko jira min b’a to Maliden bɛɛ bɛ se k’a ka dunfɛnw sɔrɔ nɔgɔya la.

Jamanakuntigi k’a sago don bɛɛ ka se k’a den kalan, min b’a to nɔgɔya ka don u ka siniɲɛsigi baaraw la ; bɛɛ ka se ka kɛnɛya ɲuman sɔrɔ jamana basigilen kɔnɔ. Maliden cɛman ni musoman bɛɛ ka se ka baara sɔrɔ, i kɛra denmisɛn ye, walima maakɔrɔ.
A ko a la Aladeli ye an ka jamana ka kɛ jamana barikalen ye, an bɛ wasa sɔrɔ min kɔnɔ. Jamanakuntigi k’a ye bɛɛ faamuya, ko ni Ala sɔnna a b’a seko jira bɛɛ haminanko la.

Alamisa zuwɛnkalo tile 11 san 2020, jamanakuntigi k’a ye a ka dannaya lakuraya minisiriɲɛmɔgɔ Dɔgɔtɔrɔ Bubu Sise kan kokura, k’a kɛ gɔfɛrɛnaman ɲɛmɔgɔ ye.  A ko sɔnnin o gɔfɛrɛnaman kura bɛ sigi, mɔgɔ faamuyalenbaw bɛna sɔrɔ min kɔnɔ, i n’a fɔ jamana sigikafɔba y’a laɲinin kɛ cogo min na san 2019 desanburukalo la.

O gɔfɛrɛnaman bɛna to jamanadenw ka bila la, ka baara kɛ ni laadiriya ye. A tɛna kɛ mɔgɔfalen dama ye ; a bɛ kɛ yɛlɛma ɲuman donni ye baara kɛtaw la, min b’a to laɲininw ka se ka sabati. U bɛna u seko jira Malidenw haminanko gɛlɛnw ɲɛnabɔli la ; i n’a fɔ basigi sabatili, hadamadenya yiriwali, politikiko ani mara kɛcogo ɲuman na.

A ko ninnu bɛna waleya joona, ka hadamadenw wasa a ɲɛma cogoya dɔw la :

1. Jamankuntigi k’a bɛ fɔlɔ k’a nɔ da kalanko ɲɛnabɔli la, ni yamaruya dili ye minisiriɲɛmɔgɔ ma, a ka sigikafɔ kɛ a ni kalanko ɲɛmɔgɔw cɛ ; walasa bɛnkan ka se ka sɔrɔ u ni ɲɔgɔn cɛ. A ko bɛnkan fɛn o fɛn mana sɔrɔ o sigikafɔ la, ale bɛ jɛn n’o waleyali ye. Sabula ko kalan ye jamana siniɲɛsigi dɔ ye. A ko kalanko silasalen mɛɛnna jamana in kɔnɔ. A k’a man kan cogo si la, denmisɛnninw ka bɔnɛ u ka hakɛw la.

2. Jamanakuntigi k’a ni mɔgɔw bɛna kumaɲɔgɔnyaw kɛ kɛnɛyako kan. K’o bɛ kɛ ni dɔgɔtɔrɔɲɛmɔgɔw ni sigidalamɔgɔw ye ; walasa ka ɲɔgɔn faamuya Bamakɔ dɔgɔtɔrɔsoba kelen-kelen lakurayacogo kan, soko ni baarakɛminɛnko ani furakɛli kɛcogo ɲumanw kan. A k’o yɛlɛma ɲumanw bɛ ɲɛsin marayɔrɔw kɛnɛyasow fana ma. Sabula kɛnɛya ye jama ka hakɛ dɔ ye.

3. Jamanakuntigi ko depitesigi kalata tɛmɛnnenw gɛlɛyara kosɛbɛ. Ko fɔɲɔngɔnkɔw cayara mɔgɔw cɛ jamana fan dɔw la. A k’o gɛlɛyaw sababu bɔra fɛn minnu na, ko an na jɛ k’an fanga fara ɲɔgɔn kan o ɲɔgɔnna wɛrɛw kunbɛncogo la. A ko a b’a ɲinin jamanadenw fɛ, u ka da u ka fangabulonw na. Sabula ko mara kɛcogo ɲuman sinsinyɔrɔ dɔ y’o ye.

4. Jamanakuntigi ko mɔgɔ minnu y’u sigiyɔrɔw bila ; kɛrɛnkɛrɛnnenya la minnu yɛlɛmanen bɛ Falajɛ, Bamakɔ komini 6an na, k’olu ye tɔɔrɔ sɔrɔ kosɛbɛ. A ko a hakili b’u la. Ko a ni gɔfɛrɛnaman kura bɛna baara dɔw boloda ka ɲɛsin u dagayɔrɔkow, an’u lasegincogow ma u ka duguw la.

5. Jamanakuntigi ko jamana in basigili ye an bɛɛ lajɛlen haminanko ye k’o bɛ san tan caman bɔ. Jamankuntigi ko jamana ka baarakɛnafolo tilalen saba ye, k’o tilayɔrɔ kelen bɛ taa basigi sabatili dafɛ san o san. A ko lakananbaaw b’u seko la ; hali ni laɲinin ma sabati fɔlɔ. A ko halibi a b’a ɲinin an bɛɛ lajɛlen fɛ, an k’an ka lakananbaaw senkɔrɔmadon.

By |2020-06-16T15:53:53+02:00juin 16th, 2020|Kibaru|0 Comments