San o san Mali kunnafoniko ni lagamuni cakɛda (AMAP) bɛ lajɛ kɛ san dɔ bantɔ sanni ka kura daminɛ. Tarata desanburukalo tile 31 san 2019, lajɛ in ɲɛmɔgɔya tun bɛ AMAPu kuntigi Berema Ture bolo. Jomansi Bonbote, Gawusu Darabo, Solomani Darabo ani Usumani Mayiga, n’olu ye AMAPu ɲɛmɔgɔ kɔrɔw ye, Kibaru ɲɛmɔgɔ Amadu Umaru Jalo, nin bɛɛ tun b’a kɛnɛ kan ; ani AMAPu kunnafonidilaw dafalen.
Laseliw kɛra kunnafonisɛbɛnw cogoyaw kan AMAPu ɲɛmɔgɔba kɔrɔw fɛ, fiɲɛ minnu bɛ se ka sɔrɔ sɛbɛnniw kɔnɔ, fiɲɛ minnu bɛ se ka sɔrɔ kunnafoni yɛrɛ sɛbɛncogo fɛɛrɛw la, ka fara laadilikanw kan baara sabatiko ɲuman na halibi, ɲinan lajɛ fanba bolila olu kan. Hakiljakabɔw kɛra u ka kumaw kan. A jirala ko kunnafonisɛbɛn tɛ yɛrɛsagokɛyɔrɔ ye. Mɔgɔ dɔ burujasɛbɛn tɛ, wa dɔ fana mandiyayɔrɔ tɛ. Kunnafonisɛbɛn ka kan ka kɛ kunnafoni lakika sɔrɔyɔrɔ ye ; sabula kunnafoni jɛlen jɔyɔrɔba bɛ yiriwaliko la. Nkalon masirilen bɛ jamanadenw malasa ka ɲɛtaa baaraw sennasiri.
O siratigɛ la, AMAPu min ye Mali kunnafoniko ni lagamuni cakɛdaba ye, a ɲuman ye o ka kɛ misali ye jamana kɔnɔ kunnafoniko cakɛda bɛɛ bolo ; sabula faso tɔgɔla cakɛdaba don. A wajibiyalen don kunnafoni jɛlen nafamaw ka sɔrɔ AMAPu bolofaraw kunnafonisɛbɛnw kɔnɔ, u ka kɛ kalanbulonw ye u kalanbaaw bolo, ni kunnafoniw sɛbɛncogo ɲumanw ye. Hadamaden ka baaraw filintan tɛ ; nka fili man kan ka caya u kɔnɔ.
Kunnafonisɛbɛnw ye suguya fila ye AMAPu la; dɔw bɛ sɛbɛn tubabukan na, dɔw fana bɛ sɛbɛn bamanankan, marakakan ani fulakan na. Ɲinan, ɲɔgɔndan dɔ tun bolodara AMAPu kunnafonidila minnu bɛ sɛbɛnni kɛ tubabukan na, olu ni ɲɔgɔn cɛ koɲɛɲini kan. O jaabi dira kɛnɛ kan. Muso saba de y’a jɔyɔrɔ fɔlɔ, filanan ani sabanan sɔrɔ. Laadiyalifɛnw dira u ma. Foliw ni tanuniw ani dugawudonw kɛra san 2020 mantɔɔrɔw mabɔli la an na, k’a hɛrɛw suuru jamanaden bɛɛ kan. Yɛlɛma kura dɔw donna baara kɛcogo la; an bɛ don min na, AMAPu ka kunnafoni caman bɛ sɔrɔ ɛntɛrinɛti kan tubabukan ni bamanankan na.
Dɔkala Yusufu Jara
